ენდომეტრიოზი იმდენად ცუდად ნაკვლევი დაავადებაა და მის შესახებ იმდენად ცოტა რამეა ცნობილი, რომ კითხვები და პასუხები მის ირგვლივ, ალბათ, ამოუწურავია. ამჯერად ჩვენს ჯგუფში (რომელიც ენდომეტრიოზის მქონე პაციენტებისთვის მხარდაჭერის სივრცეს წარმოადგენს) დასმული რამდენიმე კითხვა გამოვარჩიეთ და ანუკა ჭონიშვილს ვთხოვეთ ამ თემებზე ესაუბრა.
როგორ იკვეთება ენდომეტრიოზი უნაყოფობასთან? კვერცხუჯრედის ხარისხს აფუჭებს თუ რამე სხვა?
ენდომეტრიოზის დიაგნოზის მქონე პაციენტებთან ხშირია შვილოსნობასთან დაკავშირებული პრობლემები, ერთ-ერთი ყველაზე გავრცელებული თეორია ენდომეტრიოზის დროს წარმოქმნილ შეხორცებებს უკავშირდება – ხდება ფალოპის მილების გამავლობის დათრგუნვა, ბოლო პერიოდში ასევე უფრო ხშირად საუბრობენ კვერცხუჯრედის ხარისხთან დაკავშირებით – კერძოდ საკვერცხეში არსებული ენდომეტროიდული კისტის გავლენაზე – თუმცა სამწუხაროდ ეს უკანასკნელი თეორია ჯერ-ჯერობით ფართომასშტაბიან კვლევას არ ეფუძნება.
რა შეიძლება გააკეთოს ქალმა თუ იცის რომ ენდომეტრიოზი აქვს და თუ ასევე იცის რომ შვილის ყოლა უნდა (ჯერ ოპერაცია თუ ჯერ ცდის დაწყება)
მსოფლიოს წამყვანი სამედიცინო ორგანიზაციები პირველ რიგში აუცილებლად მცდელობის დაწყებას უწევენ რეკომენდაციას, და ორსულობის არ დადგომის შემთხვევაში შემდგომ უკვე დამატებით კვლევებს და საჭიროების შემთხვევაში ქირურგიულ ჩარევასაც.
როცა არაა ბევრი შეხორცება და საკვერცხის ცისტებიც პატარაა ანუ ოპერაციის ჩვენება არაა და მაინც არ დგება ორსულობა სადაა გამოსავალი ინ ვიტროს გარდა?
აუცილებლად გამოიკვლიეთ პარტნიორის სპერმა, ენდომეტრიოზის დიაგნოზი არ ნიშნავს რომ მხოლოდ ქალის ორგანიზმს აქვს დაორსულების პრობლემა, სამწუხაროდ ამ კითხვაზე პასუხი საკმაოდ ფართო გამოვა თუ არ გვექნება კონკრეტული მონაცემები, მაგალითად როგორია ჰორმონების მაჩვენებლები, რამდენი ხანია ცდილობთ დაორსულებას? წონა, ძილის რეჟიმი, ცხოვრების წესი და ასე შემდეგ
ან ეს შეხორცება ნაწლავიდან და მენჯის ღრუდან როგორ შეიძლება მოვიშოროთ ქირურგიის გარეშე? ჰორმონალური თერაპია შეძლებს ამას?
შეხორცებითი პროცესების გათიშვა ქირურგიული გზით არის შესაძლებელი.
რა ანალიზების / ჩექაფების გაკეთებაა რეკომენდებული ყოველწლიურად ენდომეტრიოზის მქონე ქალებისთვის? (ბიუჯეტური და არაბიუჯეტური ვერსიები)
სტანდარტული სკრინინგული ტესტები რომელიც ასაკობრივი ჯგუფის მიხედვით გეკუთნით და შესაძლებელია სკრინინგ ცენტრებში უფასოდაც გაიკეთოთ (პაპ ტესტი, ძუძუს ექოსკოპია), დამატებით გინეკოლოგიური ულტრაბგერითი კვლევა სადაც მოხდება ენდომეტროიდული კერების დინამიკაში დაკვირვება, სხვა დამატებითი ანალიზები ჩივილების შემთხვევაში შესაძლებელია დაინიშნოს
კვლავ განვიცდი ტკივილს ორსულობის დროს?
გამომადინარე იქედან რომ ენდომეტრიოზის დროს სიმტომები ჰორმონალურ ცვლილებებთან (ესტროგენ/პროგესტერონის) დონეებთან არის დაკავშირებული, ორსულობის დროს მაშინ როცა ქალი არ მენსტრუირებს შესაბამისად ტკივილი აღარ ფიქსირდება, სხვა ყველა სიმპტომი (შებერილობა, სისუსტე და ასე შემდეგ) ორსულობის დროს გამოწვეულ ცვლილებებთანაა დაკავშირებული
კურნავს თუ არა ორსულობა ენდომეტრიოზს?
არა, ორსულობა არ კურნავს ენდომეტრიოზს. უმეტესწილად, ტკივილი ბრუნდება მშობიარობის შემდეგ, როდესაც მენსტრუაცია განახლდება.
პროექტის ფინანსური მხარდამჭერია ქალთა ფონდი საქართველოში.